kam-fursati-e-khvab-e-tarab yaad rahegi
guzri jo tire saath vo shab yaad rahegi
har-chand tira ahd-e-vafa bhuul gae ham
vo kashmakash-e-sabr-talab yaad rahegi
siine men umangon ka vahi shor hai ab tak
vo shokhi-e-yak-jumbish-e-lab yaad rahegi
phir jis ke tasavvur men barasne lagin ankhen
vo barhami-e-sohbat-e-shab yaad rahegi
go hijr ke lamhat bahut talkh the lekin
har baat ba-unvan-e-tarab yaad rahegi