Poet
ilahi jaise ham us sham-e-anjuman se mile
isi tarah se har ik apne gul-badan se mile
mile na shaiḳh se dil aur na barahman se mile
mile to us ke ruḳh-o-zulf-e-pur-shikan se mile
mue pa qabr men kaun aur ḳhasta-tan se mile
kafan badan se mile aur badan kafan se mile
na tang kar mujhe us ne kahan ye munh paaya
ki gul ka ghuncha tire ghuncha-e-dahan se mile
bhula de us ko abhi pal men chaukḌi saari
nigah-e-shoḳh agar ahu-e-ḳhutan se mile
ḳhuda ne qat.a kiya hai tujhi pe ye jaama
phaban kisi ka tire kis tarah phaban se mile
vo chhoḌe kyunki bhala mashq dil jalane ki
maza jise dil-e-ashufta ki jalan se mile
yahan to pech uThaya kare dil-e-sad-chak
sitam hai shana vahan zulf-e-pur-shikan se mile
faza-e-sina men yuun hai hujum aahon ka
daraḳht jaise ki aapas men hoen ghan se mile
hua ye hai hamen irshad-e-mushfiqana jo kal
ham ek bazm men haan ek ahl-e-fan se mile
ki yaad rakh tu hai sheron men aib rabt-e-kalam
vo sher hon ki na hargiz suḳhan suḳhan se mile
aur ek is ke siva yaad rakh ye hai ḳhubi
vo tarz ho ki na tarz-e-nau-o-kuhan se mile
phir us ke ba.ad dam-e-sard bhar ke farmaya
ye nukte ham ko suna the baḌe jatan se mile
savere aage bayan ham ne kar diye yunhi
bayan kijiyo jo sha.iqan-e-fan se mile
zahe nasib tujhe is tarah mili daulat
vo jo mile bhi kisi ko to ek kaThan se mile
kahen sunenge ham aapas men dard-e-dil apna
chaman men ‘aish’ jo ham bulbul-e-chaman se mile
Leave a Reply