tire ḳhayal ne ehsan la-javab kiya
nafas nafas ko mire vaqf-e-iztirab kiya
adu ka harf-e-malamat bana miri shohrat
usi ne ḳhaak ke zarre ko aftab kiya
tiri nazar ko nazar lag na jaa.e duniya ki
bhare jahan men jo mera hi intiḳhab kiya
qadam qadam pe rahi justaju-e-nam-o-numud
isi havas ne hamen umr-bhar ḳharab kiya
azal ke din se andhere mira muqaddar the
tiri nazar ne mujhe rashk-e-mahtab kiya
gila kiya tha taghaful ka ‘chand’ kyuun us se
tujhi ko ashk-e-nadamat ne aap aab kiya
Leave a Reply