saari bazm-e-talab tumhari hai
din tumhara hai shab tumhari hai
shakh-e-jan pe ye pyaar ki shabnam
pahle meri thi ab tumhari hai
meri sanson men vasl ki khushbu
jitni hai sab ki sab tumhari hai
ye jo ik be-khudi ka dariya hai
is men mauj-e-tarab tumhari hai
sochti huun ki ye badan ki mahak
kab nahin aur kab tumhari hai
nashsha-e-chashm-o-lab tumhara hai
shakh-e-bint-e-inab tumhari hai
raushni mahtab se badh kar
dil men shah-e-arab tumhari hai
tum ne socha hai ye kabhi ‘afroz’
zindagi be-sabab tumhari hai
Leave a Reply