vo shaḳhs jo zaḳhmon ki rida de ke gaya hai
is shahr men jiine ki saza de ke gaya hai
sadiyon se main sannaTon ki basti men khaḌa huun
ye kaun mujhe sang-e-sada de ke gaya hai
aaya tha koi le ke ujalon ka sahifa
be-nur charaghon ko ziya de ke gaya hai
raste men shajar hai na kahin yaad ka saaya
vo jaane mujhe kaisi dua de ke gaya hai
ḳhvabon ke darichon se guhar luTne vaala
kuchh meri talab se bhi siva de ke gaya hai
socha tha bujha dega mire soz-e-darun ko
dekha to vo sho.alon ko hava de ke gaya hai
vo phuul sa chehra ki jo kal saath tha mere
ik dard mire dil ko naya de ke gaya hai
kis soch men Duube ho pareshan ho ‘ḳhalid’
vo shaḳhs to jiine ki dua de ke gaya hai
Leave a Reply