Iqbal Tariq
dard se yaar chiḳh uTThe hain
sar-e-bazar chiḳh uTThe hain
tu kahani men kyon hua shamil
saare kirdar chiḳh uTThe hain
jin ke munh men zaban thi hi nahin
vo bhi is baar chiḳh uTThe hain
ḳhud hi aa aur aa ke dekh zara
tere shahkar chiḳh uTThe hain
teri tasvir kya lagi ghar men
dar-o-divar chiḳh uTThe hain
tera sattar vird karte hue
dil ke sab taar chiḳh uThe hain
aisi andhi chali hai nafrat ki
gul-o-gulzar chiḳh uThe hain
zindagi ka yahi vatira hai
aap be-kar chiḳh uThe hain
atish-e-fikr tujh men jalte hue
ab chaman-zar chiḳh uThe hain
jin ko nafrat sada jahan se mili
jab mila pyaar chiḳh uThe hain
chup hain mazlum zaḳhm kha kar bhi
tir-o-talvar chiḳh uThe hain
zabt karte rahe hain muddat tak
aḳhir-e-kar chiḳh uThe hain
mere daman men aa.e jab ‘tariq’
phuul aur ḳhaar chiḳh uThe hain
Leave a Reply