kahan tahriren main ne baanT di hain
hunar tadbiren main ne baanT di hain
tumhare ḳhvab ne taḳhir kar di
sabhi ta.abiren main ne baanT di hain
likho ghar ke sabhi afrad men ab
miri taqdiren main ne baanT di hain
ka.i ghazlen tumhare naam likkhin
baḌi jagiren main ne baanT di hain
suno in gunge-bahre bam-o-dar ko
ka.i taqriren main ne baanT di hain
miri ankhen jinhen mahfuz kartin
vo sab tasviren main ne baanT di hain
mire qaidi mire alfaz ‘hamid’
suḳhan zanjiren main ne baanT di hain
Leave a Reply