Syed Nawab Haider Naqvi Rahi
dard-e-jigar ḳhud apni dava ho aisa bhi ho sakta hai
yuun hi kitab-e-zar men likha ho aisa bhi ho sakta hai
hijr ki raat men sham-e-shabistan had se baḌh kar raushan thi
is hangam men dil bhi jala ho aisa bhi ho sakta hai
roz-e-azal jo ahd kiya tha insan ne vo sach hi tha
bar-e-amanat uTh na saka ho aisa bhi ho sakta hai
kahan nasheman dil ka bana.en uljhan bhi hai aur Dar bhi
ḳhud hi shikasta shaḳh-e-vafa ho aisa bhi ho sakta hai
harf-e-vafa ki koi vaq.at duniya ki nazron men nahin
harf-e-vafa hi jhuuT kaha ho aisa bhi ho sakta hai
husn-o-ishq ki laag men aḳhir kis ko mujrim Thahra.en
dil ka daman chaak hua ho aisa bhi ho sakta hai
bahr-etamanna se ‘rahi’ aa.i hai sada-e-gharqabi
dil ka safina Duub raha ho aisa bhi ho sakta hai
Leave a Reply