maslahat-kosh na the ḳhvab jalane se rahe
raat banti hui ik baat banane se rahe
bazm-e-a.inda men kab kaun kahan baiThega
raftagan sab ko ye asrar batane se rahe
tum ne lauT aane ki ummid laga.i hai abas
ham jo divar uTha den vo girane se rahe
tire pahlu se sarakte hue dil rone laga
Dubne vaale ko tairak bachane se rahe
ham se hoti nahin tash.hir-e-ta.alluq be-kar
qimti shai sar-e-divar sajane se rahe
apni dilchaspi ka saman nahin thi duniya
ham yahan Thahre magar tere bahane se rahe
Leave a Reply