Sufi
tu mire paas rahe main tiri ulfat men fana
jaise angaron pe chhinton se dhuan
bint-e-mahtab ko haale men liye
to farozan ho magar saari tapish meri ho
phaile aflak men be-samt safar
saath men vaqt ka rahvar liye
jis taraf mauj-e-tamanna kah de
justuju shauq ka patvar liye
guftugu rabt ke ehsas se duur
khamushi ranj-e-mukafat se duur
chandni ki kabhi sargoshi si
phuul ke narm labon ko chume
gard andesha ko shabnam dho de
qahqahe phutin taammul ke baghair
nuur uble kabhi favvaron men
aur nuqte men simat aae kabhi
tah-ba-tah khole rida zulmat ki
apni bebak nigahon se munavvar kar de
nuqta-e-vasl ye mitta hua dhabba hi sahi
hosh bahta hai to bah jaane de
tu mire paas rahe main tiri ulfat men fana
Leave a Reply