Saleem Faraz
ek to duniya ka karobar hai
ishq ka us par alag azar hai
kaun is ja sahab-e-kirdar hai
har koi bas ghazi-e-guftar hai
subah tak uThti rahi ah-o-fughan
kaun mujh men shaam se bedar hai
ahl-e-dil aa.e yahan taḳhir se
ab kahan vo garmi-e-bazar hai
shor men Duuba hua hai ghar tamam
aur sannaTa pas-e-divar hai
main hua be-lutf us ke qurb se
vo bhi meri shakl se bezar hai
saare dushman ho ga.e zer-e-nagin
ḳhud se ab vo bar-sar-e-paikar hai
har qadam par laḌkhaḌata huun ‘salim’
rasta shayad bahut hamvar hai
Leave a Reply