Ek to Duniya Ka Karobar Hai

ek to duniyā kā kārobār hai

ishq kā us par alag āzār hai

kaun is jā sāhab-e-kirdār hai

har koī bas ġhāzī-e-guftār hai

subah tak uThtī rahī āh-o-fuġhāñ

kaun mujh meñ shaam se bedār hai

ahl-e-dil aa.e yahāñ tāḳhīr se

ab kahāñ vo garmī-e-bāzār hai

shor meñ Duubā huā hai ghar tamām

aur sannāTā pas-e-dīvār hai

maiñ huā be-lutf us ke qurb se

vo bhī merī shakl se bezār hai

saare dushman ho ga.e zer-e-nagīñ

ḳhud se ab vo bar-sar-e-paikār hai

har qadam par laḌkhaḌātā huuñ ‘salīm’

rāsta shāyad bahut hamvār hai

Leave a Comment