yuun to dekhi hain mire yaar sabhi ki ankhen
us ki ankhon si kahan aur kisi ki ankhen
vo to parbat ki bulandi ko bhula baiThi hai
gum hain yuun tere ubharon men nadi ki ankhen
us ki gardan ke sabhi tauq utar jaate hain
jis pe uTh jaati hain ik baar vali ki ankhen
bas tiri raah men luTne ko tule baiThe hain
kisi lamhe ka badan ho ki sadi ki ankhen
hijr ka vaqt batati hai hamesha ‘noman’
dekhta huun main jo har baar ghaḌi ki ankhen
Leave a Reply