Nazeer Siddiqui
badal ga.i hai kuchh aisi hava zamane ki
ki aam ho ga.i aadat nazar churane ki
ye baat kaash samajhte sabhi chaman vaale
chaman luTa to nahin ḳhair ashiyane ki
unhen ḳhabar nahin vo ḳhud bhi azma.e ga.e
jinhen thi fikr bahut mujh ko azmane ki
koi kali na rahi phir bhi muskura.e baghair
saza agarche muqarrar thi muskurane ki
hua yahi ki vo takmil tak pahunch na saka
bahut latif thi tamhid jis fasane ki
ik aap hi pe nahin munhasir janab-e-‘nazir’
baḌe baḌon ko hava lag ga.i zamane ki
Leave a Reply