zikr-e-shab-e-firaq se vahshat use bhi thi
meri tarah kisi se mohabbat use bhi thi
mujh ko bhi shauq tha na.e chehron ki diid ka
rasta badal ke chalne ki aadat use bhi thi
is raat der tak vo raha mahv-e-guftugu
masruf main bhi kam tha faraghat use bhi thi
mujh se bichhaḌ ke shahr men ghul-mil gaya vo shaḳhs
halanki shahr-bhar se adavat use bhi thi
vo mujh se baḌh ke zabt ka aadi tha ji gaya
varna har ek saans qayamat use bhi thi
sunta tha vo bhi sab se purani kahaniyan
shayad rafaqaton ki zarurat use bhi thi
tanha hua safar men to mujh pe khula ye bhed
saa.e se pyaar dhuup se nafrat use bhi thi
‘mohsin’ main us se kah na saka yuun bhi haal dil
darpesh ek taaza musibat use bhi thi
Leave a Reply