parda haTa ke jab vo hasin muskura.ega
bijli hamare hosh-o-ḳhirad par gira.ega
kya thi ḳhabar ki tark-e-ta.alluq ke baad bhi
ham ko vo shoḳh parda-nashin yaad aa.ega
ummid-o-arzu ki tabahi to dekh li
ab aur kya hamen ye muqaddar dikha.ega
ai qalb-e-zar sabr-o-tahammul se kaam le
kab tak kisi ki yaad men aansu baha.ega
meri zaban se sun na sake vo agar to kya
rudad meri un ko zamana suna.ega
jis raaz ko chhupa na sake qais-o-kohkan
ai qalb-e-gham-nasib tu kaise chhupa.ega
‘nayyar’ ghamon ki tez havaon ke samne
kab tak ḳhayal-o-ḳhvab ki sham.a jala.ega
Leave a Reply