tarik zindagi ko banane laga hai vo
suraj se raushni ko churane laga hai vo
likh likh ke mere naam aziyyat ke dasht-o-dar
jagir mere gham ki baḌhane laga hai vo
ehsas ki salib liye chal raha huun main
dasht-e-junun men shor machane laga hai vo
mujh se hi le ke mere saliqe ki raushni
tahzib ki zaban sikhane laga hai vo
taḳhliq-e-ka.enat ka gar main sabab raha
phir kyuun mira vaqar ghaTane laga hai vo
parvardigar meri shahadat qubul kar
talvar le ke samne aane laga hai vo
‘ḳhalid’ main us ke haath ki tahrir tha magar
harf-e-ghalat samajh ke miTane laga hai vo
Leave a Reply