jaan se apni guzarta kaun hai
sab kaha karte hain karta kaun hai
hai sabhi ko bagh-e-jannat ki havas
atish-e-dozaḳh se Darta kaun hai
dil ke virane men mere shaam se
roz ye sajta sanvarta kaun hai
nilgun jhilen hain ya ankhen tiri
Duub kar in men ubharta kaun hai
kuchh hasin chehre nazar aa.e to hain
dekhiye dil men utarta kaun hai
ḳhaak men ik roz mil jaate hain sab
ḳhushbuen ban kar bikharta kaun hai
Leave a Reply