aish-e-ummid hi se khatra hai
dil ko ab dil-dahi se khatra hai
hai kuchh aisa ki us ki jalvat men
hamen apni kami se khatra hai
jis ke aghosh ka huun divana
us ke aghosh hi se khatra hai
yaad ki dhuup to hai rose ki baat
haan mujhe chandni se khatra hai
hai ajab kuchh moamla darpesh
aql ko agahi se khatra hai
shahr-e-ghaddar jaan le ki tujhe
ek amrohvi se khatra hai
hai ajab taur halat-e-girya
ki mizha ko nami se khatra hai
haal khush lucknow ka dilli ka
bas unhen ‘mushafi’ se khatra hai
asmanon men hai khuda tanha
aur har aadmi se khatra hai
main kahun kis tarah ye baat us se
tujh ko janam mujhi se khatra hai
aaj bhi ai kanar-e-ban mujhe
teri ik sanvli se khatra hai
un labon ka lahu na pi jaun
apni tishna-labi se khatra hai
‘jaun’ hi to hai ‘jaun’ ke darpai
‘mir’ ko ‘mir’ hi se khatra hai
ab nahin koi baat khatre ki
ab sabhi ko sabhi se khatra hai
Leave a Reply