Noor Bijnauri
jaga raha hai tira gham na.e na.e jaadu
umanD rahi hai ghazal se bahar ki ḳhushbu
chahak rahe hain tasavvur ke baagh men panchhi
bhaTak rahe hain ḳhayalon ke dasht men aahu
lachak raha hai fazaon men ḳhvab ka resham
bikhar ga.e hain ufuq-ta-ufuq tire gesu
na jaane kaun si manzil pe aa gaya huun main
na jaane kaun si basti men rah ga.i hai tu
mire gale men hama.il hain naaz se ab tak
mujhe na chhoḌ sake teri yaad ke baazu
kidhar ho muhtasibo phir koi naya mansur
faraz-e-dar se chhalka raha hai jam-o-subu
kabhi to bam-e-surayya ko chuum hi lega
bahut latif hai aadam ki jumbish-e-abru
Leave a Reply