Sabahat Urooj
re.aya de rahi thi shauq se begar jismon ki
yahi taqdir hai aaqa yahan nadar jismon ki
gira Dalegi tujh pe asman jo sarsarahaT hai
tumhare paanv niche rengte bedar jismon ki
muarriḳh goliyon ke ḳhol ginte ja rahe the aur
hikayat likh rahe the ham yahan mismar jismon ki
mohabbat sirf kahne ko ta.alluq tel paani sa
riyazat umr bhar karte rahe be-kar jismon ki
ḳhuda tera nizam-e-adl rabb-ul-alamin tera
shari.at tujh ko deti hai ijazat chaar jismon ki
use to fikr daman-gir thi shah ke qaside ki
kahani ik taraf rakkhi rahi bimar jismon ki
badan chhoḌo sabahat ho sake to ruuh ko thamo
koi dam girne vaali hai yahan divar jismon ki
Leave a Reply