vaqt ki aankh men sadiyon ki thakan hai, main huun
dhuul hote hue raston ka badan hai, main huun
phir tira shahr ubhar aaya hai mere har su
phir vahi log, vahi tarz-e-suḳhan hai, main huun
ek tarik sitare ka safar hai darpesh
aur ummid ki ik taaza karan hai, main huun
ek jangal hai, ghane peḌ hain, ik nahr hai aur
ik shikari hai, koi zaḳhmi hiran hai, main huun
kaun batla.e tujhe ai mire ham-zad ‘nabil’
tere ham-rah jo ik aur badan hai, main huun
Leave a Reply