dekhna ye ishq men husn-e-pazira.i ke rang
anjuman-dar-anjuman hon meri tanha.i ke rang
dil ke har goshe men jal uTThe hain zaḳhmon ke charagh
allah allah ik masiha ki masiha.i ke rang
is ada se aa ga.e hain vo nazar ke ru-ba-ru
aur gahre ho ga.e hain is dil ki bina.i ke rang
ho sadaqat ka jo da.ava dekh le ji aa.ina
aa.ine hi men nazar aate hain sachcha.i ke rang
har dar-o-divar par likkha hua hai mera naam
vaj.h-e-shohrat ban ga.e hain kitne rusva.i ke rang
har nazar apni jagah ḳhud ek jalva ban ga.i
chha ga.e aise tumhari jalva-ara.i ke rang
der tak ‘aḳhgar’ dar-e-jan par charaghon ki tarah
raushni dete rahe meri jabin-sa.i ke rang
Leave a Reply