paani se huvaida hoti hai duniya men ḳhuda ki rahmat bhi
paani men dikhai deti hai tasvir-e-azab-o-la.anat bhi
paani ki badaulat milti hai insan ko ghiza ki ne.amat bhi
sailab ki surat men paani laata hai jahan par aafat bhi
ik jhiil ke gahre paani par is vaqt jami hai meri nazar
afkar hain danva-dol mire jazbat hain mere zer-o-zabar
main ḳhushi ḳhushi utrun is men aur sat.h pe tairun hans hans kar
ya duub ke is ki lahron men pa ja.un gham-e-hasti se mafar