apnon ke sitam yaad na ghairon ki jafa yaad
vo hans ke zara bole to kuchh bhi na raha yaad
kya lutf uTha.ega jahan-e-guzaran ka
vo shaḳhs ki jis shaḳhs ko rahti ho qaza yaad
ham kaag uḌa dete hain botal ka usi vaqt
garmi men bhi aa jaati hai jab kaali ghaTa yaad
mahshar men bhi ham teri shikayat na karenge
aa ja.egi us din bhi hamen shart-e-vafa yaad
pi li to ḳhuda ek tamasha nazar aaya
aaya bhi to aaya hamen kis vaqt ḳhuda yaad
allah tira shukr ki ummid-e-karam hai
allah tira shukr ki us ne bhi kiya yaad
kal tak tire baa.is main use bhula hua tha
kyuun aane laga phir se mujhe aaj ḳhuda yaad
Leave a Reply