Shamim Ravish
is se pahle ki charaghon ko vo bujhta dekhe
us se kahna ki vo aa.e mira chehra dekhe
us se kahna mire chehre se ye ankhen le jaa.e
us se kahna ki kahan tak koi rasta dekhe
main ne dekha hai samundar men utarta suraj
us se kahna ki mashiyyat ka ishara dekhe
us se kahna ye munadi bhi kara di jaa.e
koi is ahd men ab ḳhvab na sachcha dekhe
ek muddat se in ankhon men koi ḳhvab nahin
us se kahna vo koi ḳhvab na aisa dekhe
us se kahna kabhi vo bhi to sar-e-sham ‘ravish’
meri palkon pe sitaron ko utarta dekhe
Leave a Reply