main dariya huun magar donon taraf sahil hai tanha.i
talatum-ḳhez maujon men miri shamil hai tanha.i
mohabbat ho to tanha.i men bhi ik kaif hota hai
tamannaon ki naghma-afrin mahfil hai tanha.i
bahut din vaqt ki hangama-ara.i men guzre hain
inhen guzre hue ayyam ka hasil hai tanha.i
hujum-e-zist se duuri ne ye mahaul baḳhsha hai
akeli main mira kamra hai aur qatil hai tanha.i
mire har kaam ki mujh ko vahi tahrik deti hai
agarche dekhne men kis qadar mushkil hai tanha.i
usi ne to taḳhayyul ko mire parvaz baḳhshi hai
ḳhuda ka shukr hai jo ab kisi qabil hai tanha.i
mohabbat ki shuaon se tavana.i jo milti hai
isi rangini-e-mafhum men daḳhil hai tanha.i
ḳhuda hasrat-zada dil ki tamannaon se vaqif hai
dua.en roz-o-shab karti hui saa.il hai tanha.i
kisi ki yaad hai dil men abhi tak anjuman-ara
‘sabila’ kaun samjhega ki mera dil hai tanha.i
Leave a Reply