Phul Ne Tahni Se Udne Ki Koshish Ki

phuul ne tahni se udne ki koshish ki

ik taair ka dil rakhne ki koshish ki

kal phir chand ka khanjar ghonp ke siine men

raat ne meri jaan lene ki koshish ki

koi na koi rahbar rasta kaat gaya

jab bhi apni rah chalne ki koshish ki

kitni lambi khamoshi se guzra huun

un se kitna kuchh kahne ki koshish ki

ek hi khvab ne saari raat jagaya hai

main ne har karvat sone ki koshish ki

ek sitara jaldi jaldi Duub gaya

main ne jab taare ginne ki koshish ki

naam mira tha aur pata apne ghar ka

us ne mujh ko khat likhne ki koshish ki

ek dhuen ka marghola sa nikla hai

mitti men jab dil bone ki koshish ki

Leave a Comment