dikha.i de na kabhi ye to mumkinat men hai
vo sab vajud men hai jo tasavvurat men hai
main jis hunar se huun poshida apni ghazlon men
usi tarah vo chhupa saari ka.enat men hai
ki jaise jism ki rag rag men dauḌta hai lahu
isi tarah vo ravan arsa-e-hayat men hai
ki jaise sang ke siine men koi but hai nihan
usi tarah koi surat taḳhaiyyulat men hai
ki jaise vaqt guzarne ka kuchh na ho ehsas
usi tarah vo sharik-e-safar hayat men hai
ki jaise bu-e-vafa ḳhud-supurdagi men mile
usi tarah ki mahak us ki iltifat men hai
ki jaise jhuuT ka.i jhuuT ke sahare le
usi tarah vo pareshan takallufat men hai
gunah bhi koi jaise kare Dare bhi bahut
usi tarah ki jhijhak us ki baat baat men hai
bas ab to ishq hai hijr-o-visal kuchh bhi nahin
ye TukḌa ziist ka din men hai aur na raat men hai
nazar ke zaviye badle hai aur kuchh bhi nahin
vahi hai ka.abe men jo ‘nur’ somnath men hai
Leave a Reply