dil zulf-e-butan men hai giraftar hamara
is daam se hai chhutna dushvar hamara
bazar-e-jahan men hain ajab jins-e-zabun ham
koi nahin ai vaae kharidar hamara
thi davar-e-mahshar se tavaqqo so tujhe dekh
vo bhi na hua haae taraf-dar hamara
kyunkar na dam-e-sard bharen ham ki har ik se
milta hai bahut garm kuchh ab yaar hamara
tujh bin use ye samjhen ki hai shola-e-dozakh
gar ho gul-e-jannat gul-e-dastar hamara
‘rasikh’ ye pas-e-marg bhi hamrah rahega
hai yaar ka gham yar-e-vafadar hamara
Leave a Reply