Kahin Se Chand Kahin Se Qutub-Numa Nikla

kahīñ se chāñd kahīñ se qutub-numā niklā

qadam jo ghar se nikālā to rāsta niklā

jalāyā dhuup meñ ḳhud ko to ek saaya sā

hamāre jism kī dīvār se lagā niklā

tamām-umr bhaTaktā rahā maiñ tere liye

tirā vajūd hī hastī kā mudda.ā niklā

tumhārī āñkhoñ meñ sadiyoñ kī pyaas Duub ga.ī

hamārī ruuh se ehsās-e-karbalā niklā

gurez karne lagā hai tire ḳhayāl se bhī

hamārā dil bhī tirī tarah bevafā niklā

mirā hī naam kabhī ‘mīr’ thā ġhazal vaalo

na.e safar meñ bhī merā hī naqsh-e-pā niklā

charāġh ghar meñ jalā chhoḌ kar ga.e the ‘shakīl’

safar se lauTe to sab kuchh bujhā bujhā niklā

Leave a Comment