Jameeluddin Aali
koi to shakl mohabbat men sazgar aa.e
hansi nahin hai to rone se hi qarar aa.e
hai ek ne.amat-e-uzma gham-e-mohabbat bhi
magar ye shart ki insan ko sazgar aa.e
junun-e-dasht-pasandi bata.e deta hai
guzarni thi jo ghar men vo ham guzar aa.e
guzarni hai mujhe umr tere qadmon men
mujhe na kyuun tire va.adon pe e’tibar aa.e
tumhari bazm se aa kar vahi ḳhayal raha
ham ek baar ga.e tum hazar baar aa.e
nigah-e-dost koi aur baat hai varna
tu be-qarar kare aur mujhe qarar aa.e
hai mutma.in bhi to kis kis umid-o-bim ke saath
vo na-murad jise lutf-e-intizar aa.e
bata ga.i hai jo mujh ko vo be-qarar nigah
na kah sakunga agar aaj bhi qarar aa.e
ye imtiyaz hai ‘ghalib’ ke ba.ad ‘ali’ ka
ki jis pe aap mare hain use bhi maar aa.e
Leave a Reply