Cba Fb A Dddba
us ki ankhon men tamanna-e-sahar rakh dena
sina-e-shab men kisi baat ka Dar rakh dena
aaj guzrega isi samt se vo mahr-e-badan
dil ke raste men zara chand shajar rakh dena
ye na kahna ki andhera hai bahut rahon men
us se milna to hatheli pe qamar rakh dena
us ko ash.ar sunana to karamat ke saath
apne TuuTe hue lafzon men asar rakh dena
vardaten to ka.i shahr men guzri hongi
aaj aḳhbar men meri bhi ḳhabar rakh dena
jis varaq par hai hadis-e-lab-o-ruḳhsar raqam
us varaq par koi barg-e-gul-e-tar rakh dena
ek mahtab daraḳhshan hai sar-e-bam-e-ḳhayal
meri ankhon men bhi nairang-e-nazar rakh dena
lala-e-sang se tarashe vo koi paikar-e-sang
dast-e-sanna.a men ik ye bhi hunar rakh dena
Leave a Reply