hai dhyan jo apna kahin ai mah-jabin aur
jaana hai kahin aur to jaata huun kahin aur
jab tu hi kare dushmani ham se to ghazab hai
tere to siva apna koi dost nahin aur
main hashr ko kya rouun ki uth jaate hi tere
barpa hui ik mujh pe qayamat to yahin aur
vaada to tire aane ka hai sach hi va-lekin
baazu ke phadakne se hua dil ko yaqin aur
akhir tu kahan kucha tira aur kahan ham
kar leven yahan baith ke ik ah-e-hazin aur
tha ru-e-zamin tang zi-bas ham ne nikali
rahne ke liye sher ke aalam men zamin aur
naam apna likhave to likha dil pe tu mere
is naam ko behtar nahin is se to nagin aur
abru ki to thi chiin mire dil pe ghazab par
mizhgan se numudar hue khanjar-e-kin aur
nikle to usi kucha se ye gum-shuda nikle
dhundhe hai ‘hasan’ dil ko to phir dhund vahin aur
Leave a Reply