Jo Baat Dil Mein Thi Wo Kab Zaban Par Aai

jo baat dil men thi vo kab zaban par aa.i

suna raha hai fasane fareb-e-goya.i

na.e charagh sar-e-rahguzar jala aa.i

hava-e-nik.hat-e-gul thi ki meri bina.i

tu garm raat men ThanDi hava ka jhonka tha

zara qarib se guzra to niind si aa.i

jo baat tujh men hai vo dusron men kya milti

jo baat mujh men hai tu ne bhi vo kahan paa.i

vo yaad aa.e to dil aur ho gaya viran

vo mil ga.e to baḌha aur dard-e-tanha.i

bahut dinon se mira dil udaas bhi to nahin

bahut dinon se tiri yaad bhi nahin aa.i

‘salim’ qurb se bhi tishnagi nahin jaati

ye baat sahil-o-dariya ne mujh ko samjha.i