Moin Shadab
ye tai nahin ki sada ansuon se likkhenge
kabhi to ham bhi ghazal ḳhushbuon se likkhenge
hamari pyaas ka ahval reg-zaron par
sulagte chiḳhte mausam lavon se likkhenge
sahafiyon ko kahan hal-e-dil suna baiThe
zara si baat ka.i zaviyon se likkhenge
na ḳhush ho jaan ke be-dast ham tira anjam
inhen tarashe ga.e bazuon se likkhenge
bhale hi TuuT chuki hain magar hamen saunpo
ki ham kinara inhen chappuon se likkhenge
Leave a Reply