Yaadon Ke Darichon Se Bite Ayyam Ki KHushbu Aati Hai

Poet

yadon ke darichon se biite ayyam ki ḳhushbu aati hai

taskin ke jhonke aate hain aram ki ḳhushbu aati hai

kuchh bol ki mustaqbil ki girah ham be-ḳhabron pe khul jaa.e

saaqi tiri miThi baton se ilham ki ḳhushbu aati hai

kis gulshan-e-ghair-arzi men mujhe rahvar-e-saba le aaya hai

har samt se mujh ko ek gul-e-be-nam ki ḳhushbu aati hai

ik baar tire aane se kabhi gulban ki tarah jo mahka tha

har gosha-e-shab se aaj usi hangam ki ḳhushbu aati hai