Irfan Siddiqi
ab zaban ḳhanjar-e-qatil ki sana karti hai
ham vahi karte hain jo ḳhalq-e-ḳhuda karti hai
phir koi raat bujha deti hai meri anhken
phir koi sub.h dariche mire va karti hai
ek paiman-e-vafa ḳhak-basar hai sar-e-sham
ḳhema ḳhali hua tanha.i aza karti hai
hu ka aalam hai giraftaron ki abadi men
ham to sunte the ki zanjir sada karti hai
kaisi miTTi hai ki daman se lipaTti hi nahin
kaisi maan hai ki jo bachchon ko juda karti hai
ab numudar ho is gard se ai naqa-savar
kab se basti tire milne ki dua karti hai
Leave a Reply