saath mere apne saae ke siva koi na tha
ajnabi the sab jahan men ashna koi na tha
saare rishte ret ki divar the mausam ke phuul
baat ka sachcha yahan dil ka khara koi na tha
jin ke dhoke the misali jin ki baten neshtar
sirf ham mohsin the un ke dusra koi na tha
zindagi ki daud men har shakhs tha be-asra
shor-e-be-hangam men naghma-sara koi na tha
ik shajar aisa bhi rah-e-zist men ‘sarvat’ mila
phuul to shakhon pe the patta hara koi na tha
Leave a Reply