ḳhak-zada huun magar ta-ba falak jaata hai
mera idrak bahut duur talak jaata hai
teri nisbat ko chhupata to bahut huun lekin
tera chehra miri ankhon se jhalak jaata hai
ik haqiqat se ubhar aata hai har shai ka vajud
ek jugnu se andhera bhi chamak jaata hai
yuun to mumkin nahin dushman mire sar par pahunche
pahre-daron men koi aankh jhapak jaata hai
main faqat ḳhaak pe rakhta huun jabin ko ‘shahbaz’
asman ḳhud hi miri samt sarak jaata hai
Leave a Reply