is tarah kho gaya huun main apne vajud main
ab ḳhud ko DhunDta huun main apne vajud men
aadat si paḌ ga.i hai jo tanqis ki mujhe
kiiḌe nikalta huun main apne vajud men
kuchh is tarah se Dhaa.e hain halat ne sitam
gum ho ke rah gaya huun main apne vajud men
tum to mire vajud ka hissa na the kabhi
kyon tum ko DhunDhta huun main apne vajud men
qaa.em hai mujh men mere taḳhayyul ki saltanat
be-taj badsha huun main apne vajud men
mujh par mire vajud ka har naqs hai ayaan
ḳhud ek aa.ina huun main apne vajud men
‘nayab’ inqilab-e-zamana ki hai dalil
badlav dekhta huun main apne vajud men
Leave a Reply