Naseer Turabi
marham-e-vaqt na ejaz-e-masiha.i hai
zindagi roz na.e zaḳhm ki gahra.i hai
phir mire ghar ki fazaon men hua sannaTa
phir dar-o-bam se andesha-e-goya.i hai
tujh se bichhḌun to koi phuul na mahke mujh men
dekh kya karb hai kya zaat ki sachcha.i hai
tera mansha tire lahje ki dhanak men dekha
tiri avaz bhi shayad tiri angḌa.i hai
kuchh ajab gardish-e-parkar safar rakhta huun
do-qadam mujh se bhi aage miri rusva.i hai
kuchh to ye hai ki miri raah juda hai tujh se
aur kuchh qarz bhi mujh par tiri tanha.i hai
kis liye mujh se gurezan hai mire samne tu
kya tiri raah men haa.il miri bina.i hai
vo sitare jo chamakte hain tire angan men
un sitaron se to apni bhi shanasa.i hai
jis ko ik umr ghazal se kiya mansub ‘nasir’
us ko parkha to khula qafiya-paima.i hai
Leave a Reply