Ehsan Danish
kahan mahfil men mujh tak bada-e-gulfam aata hai
jo mera naam aata hai to ḳhali jaam aata hai
na aao tum to phir kyuun hichkiyon par hichkiyan aa.en
inhen roko ye kyuun paigham par paigham aata hai
ye savan ye ghaTa ye bijliyan ye TuTti raten
bhala aise men dil valon ko kab aram aata hai
adab ai jazba-e-bebak ye ah-o-fughan kaisi
ki aisi zindagi se maut par ilzam aata hai
madad ai marg-e-nakami naqahat ka ye aalam hai
baḌi mushkil se honTon tak kisi ka naam aata hai
ḳhuda rakkhe tujhe ai sar-zamin-e-shahr-e-ḳhamoshan
yahin aa kar har ik bechain ko aram aata hai
ma.az-allah miri ankhon ka izhar-e-tang-zarfi
Tapak paḌte hain aansu jab tumhara naam aata hai
zamane men nahin dil-dada-e-mehr-o-vafa koi
tujhe dhoka hai ai dil kaun kis ke kaam aata hai
Leave a Reply