Aankh Tikti Na Thi Chehre Pe Hasin Aisa Tha

aankh tikti na thi chehre pe hasin aisa tha

dil ki duniya men koi jalva-nashin aisa tha

dastaras men thi magar pa na saka vo mujh ko

dil men ik umr se vo shakhs makin aisa tha

ahd-o-paiman se mukarne ka saliqa tha use

deta rahta tha dalilen vo zahin aisa tha

ab to banjar hua viran hua barbad hua

khitta-e-dil kabhi shadab-zamin aisa tha

mujh ko jagir samajhta tha vo apni janan

main usi ki huun use mujh pe yaqin aisa tha

Leave a Comment