Masoom Ansari
bahar ban ke chaman ki faza men shamil hai
ye kis ke jism ki ḳhushbu hava men shamil hai
kabhi mila na koi guftugu hui jis se
vo kaun hai jo miri har dua men shamil hai
main jitna bach ke chalun utna khinchta hai mujhe
ajab tilism-e-tamanna ḳhata men shamil hai
sunega vo to yaqinan javab bhi dega
ye kaisa Dar hai jo meri sada men shamil hai
ilaaj ke liye bimar ab kahan jaa.en
ki ek zahr yahan har dava men shamil hai
banegi baat bhala kis tarah vahan ‘ma.asum’
ana ka rang jahan iltija men shamil hai
Leave a Reply