nikhar saka na badan chandni men sone se
sahar hui to ḳharashen chunin bichhaune se
sadaf liye hue ubhri hai laash bhi meri
bacha rahe the mujhe log gharq hone se
hunar hai tujh men to qaa.il bhi kar zamane ko
chamak uThegi na shakl aa.ine ko dhone se
lipaT rahi hain mire raston se raushaniyan
nazar men log hain kuchh sanvle salone se
laga ke zaḳhm bahane chala hai ab aansu
ruka hai ḳhuun kahin paTTiyan bhigone se
hamin na hon kahin dekho to ghaur se logo
hain tifl-e-vaqt ke hathon men kuchh khilaune se
mire dukhon se bhi kuchh fa.eda uTha duniya
zamin ki pyaas bujhe badalon ke rone se
lahu ragon men ‘muzaffar’ chhuḌa.e mahtabi
mile hai kya use chingariyan chubhone se
Leave a Reply