vahi svad-e-haram hai vahi hain but-ḳhane
suna.e jaate hain unvan badal ke afsane
hansi ḳhud apni uḌa le rahe hain divane
junun ki kaun si manzil hai ye ḳhuda jaane
ma.al-e-shauq se ahl-e-vafa ko kya matlab
ba-jabr-e-ishq khinche aa rahe hain parvane
vo jan-sapari-e-parvana dilgudazi-e-sham.a
hain shab ko talḳh haqa.eq sahar ko afsane
ghurur-e-husn-e-nazar se mujhe gira na saka
vafa ki kaun si manzil hai ye ḳhuda jaane
jabin ke saath ‘jamali’ ka dil bhi jhukta hai
kashish si husn-e-butan men hai kya ḳhuda jaane
Leave a Reply