karb-e-taḳhliq ka chhaya raha manzar mujh par
ayat-e-ishq utarti rahi shab bhar mujh par
ek saa.at ko bhulaya tha gham-e-ishq abhi
band hone laga taḳhliq ka har dar mujh par
jagte vaqt vahi shaḳhs labada tha mira
nim-shab ko jo utara gaya paikar mujh par
chiil kavvon ki tarah kha ga.e rishte mere
phir bhi ilzam dhara jaata hai mujh par mujh par
ḳhalq ne navak-e-dushnam se chhalni kar ke
jabr ke tiir chala.e hain barabar mujh par
shaam hote hi udasi ki hava chalti hai
TuuT paḌta hai ḳhayalat ka lashkar mujh par
jab kabhi meri tavajjoh men ḳhalal aata hai
phunk deta hai koi ishq ka mantar mujh par
‘abdi’ ishq adavat hai kaha tha ik din
aks mera hi chalane laga ḳhanjar mujh par
Leave a Reply