Shahryar

Bahte Dariyaon Mein Pani Ki Kami Dekhna Hai

bahte dariyaon men paani ki kami dekhna hai

umr bhar mujh ko yahi tishna-labi dekhna hai

ranj dil ko hai ki ji bhar ke nahin dekha tujhe

khauf is ka tha jo ainda kabhi dekhna hai

shab ki tariki dar-e-khvab hamesha ko band

chand din baad to duniya men yahi dekhna hai

khuun ke qatron ne tufan utha rakkha hai

ab rag-o-pai men mujhe barf jami dekhna hai

kis tarah rengne lagte hain ye chalte hue log

yaaro kal dekhoge ya aaj abhi dekhna hai

Leave a Comment