Hawa Aur Suraj Ka Muqabla

ik musafir apni dhun men tha ravan

us ko in donon ne taaka na-gahan

ho gae aapas men tai qaul-o-qarar

jo labada le musafir ka utaar

bas usi ke naam ka Danka baje

sar pe dastar-e-fazilat vo saje

phir to andhi ban ke chal nikli hava

aisi biphri kar diya tufan bapa

unche unche ped tharrane lage

jhok se jhokon ki charrane lage

naunihalon ki kamar bal kha gai

phuul patton par qayamat aa gai

kaanp uthe us dasht ke kul vahsh o tair

mangte the apne apne dam ki khair

ho gaya daman-e-sahra gard-bard

ghir gaya aafat men vo sahra-navard

chahti thi luun libade ko uchak

muddai ko duun sar-e-maidan zak

jab hava leti thi chakkar men lapet

baith jaata tha vo daman ko samet

sina-zori se na chori se Dari

kar saki lekin na kuchh gharat-gari

bandh li kas kar musafir ne kamar

ta hava ka ho na kapdon men guzar

thak gai akhir na us ka bas chala

tal gai sar se musafir ke bala

ab thama jhakkad to nikla aftab

ru-e-nurani se sarkai naqab

tamkanat chehre se us ke ashkar

chaal men ik burd-bari aur vaqar

vo hava ki si na thi yaan dhum-dham

kar raha tha chupke chupke apna kaam

dhimi dhimi kirnen chamkane laga

rafta rafta sab ko garmane laga

us musafir ko pasina aa gaya

khol Daale band ji ghabra gaya

aur aage ko badha to dhuup se

tan-badan men kuchh patange se lage

ab libade ko liya kandhe pe Daal

badli yuun naubat ba naubat chal-Dhal

jab chadha khurshid samt-u-rras par

baith kar saae men phir to ghaas par

duur phenka us libade ko utaar

vah-re suraj liya maidan maar

tezi-o-tundi ke girvida hain sab

kamyabi ka magar hai aur Dhab

us ka gur hai narmi o ahistagi

sar-kashi ki rag usi se hai dabi

Leave a Comment