a.ina-e-vahshat ko jila jis se mili hai
vo gard rah-e-tark-e-marasim se uThi hai
sadiyon ke tasalsul men kahin gardish-e-dauran
pahle bhi kahin tujh se mulaqat hui hai
ai karb-o-bala ḳhush ho na.i nasl ne ab ke
ḳhud apne lahu se tiri tariḳh likhi hai
us kaj-kulah-e-ishq ko ai mashq-e-sitam dekh
sar tan pe nahin phir bhi vahi sarv-qadi hai
kis raah se tujh tak ho rasa.i ki har ik samt
duniya kisi divar ke manind khaḌi hai
zindan ki fasilen hon ki maqtal ki faza.en
raftar-e-junun bhi kahin roke se ruki hai
jis ruup men jab chahe jise Dhaal de ‘ummid’
duniya bhi ajab kar-gah-e-kuza-gari hai
Leave a Reply